Heelwegs Volksleid


Et olde plaetsken Heelweg, wa’j in de Graafschap vindt, 
lig tussen Vennebulten en de Slingebekke in. 
Gemuud’lijk is hier t’laeven wa’k elders zo vaak mis, 
toch hef et un ve’leden riek an geschiedenis. 

Vlakbi’j de Vennebulten, daor lig et Zwarte Ven, 
daar gao’j veur de natuurschoon en veur ontspanning hen. 
De bossen en de vennen, die thans zo vraedig ligt, 
herinnert toch an tieden van radstaak en gericht. 

Al is d’r deur de jaoren al heel völ moois vergaon, 
toch bleef uut vrögger tieden de Hessenweg bestaan, 
Wat al-tied is e’bleven, dat is de boerenstand, 
van vrogger töt an heden, in dit stuk Gelderland. 

Deur dizze stoere werkers, met inzet en met kracht, 
belaeve wi’j de welvaart welke zie ons heb e’bracht. 
In onze kleine buurtschap heb wi’j un sterke band, 
Gif’t tegenslag of bli’jdschap, wi’j holt mekaar de hand.